Umabot iti nasursurok ngem uppat a milyon a pisos ti naipaay kadagiti walo gasut a health care workers manipud iti Provincial Health Office ken dagiti Rural Health Units ditoy probinsia.
Mainaig iti daytoy, impadanon ni Gob. Matthew J. Marcos Manotoc ti panagyamanna kenni Dr. Rogelio Balbag, Executive Director ti Ilocos Norte Hospital and Management Council a mangpalpalagip kenkuana iti pannakaipaay ti benepisio kadagiti health care workers.
Imbatadna a masapul a saan a mabaybay-an dagiti health care workers gapu ta dagitoy ti kangrunaan a makagapo iti pannakatagiben ti salun-at ditoy probinsia.
Kunana a nakabaelan ti Ilocos Norte a linabanan ti pandemia a gubuay ti COVID-19 iti babaen ti tulong dagiti health care workers.
Mamati ti gobernador a nalasaten ti probinsia ti kadaksan nga epekto ti COVID-19.
Mainaig iti daytoy, saan a mabubos ti panagyaman ti gobernador kadagiti health care workers ken kadagiti agserserbi kadagiti hospital.
Kagiddan daytoy, inpanamnamana ti agtultuloy a pannakapasayaat dagiti hospital ditoy probinsia.
Inpasiguradona ti agtultuloy a suportana ken ti gobierno probinsial kadagiti health care workers. (Irene Ringor)
(Source: Provincial Government of Ilocos Norte – Communications & Media Office)