Kinablaawan ni Gob. Matthew Marcos Manotoc ti Department of Education iti pannakaipatakder ti baro a pasdek dagitoy para iti naan-annayas a pannakaipatungpal dagiti ganuat iti benneg ti edukasyon.
Daytoy ket kalpasan ti inagurasyon ken pannakabendisyon ti baro a pasdek ti Dep. Ed Ilocos Norte.
Inbunannag ti gobernador a nupay awan ti naitulong ti probinsia iti pannakakumpleto ti pasdek ket naiget ti suporta nga ipapaayna iti Dep. Ed.
Mainaig iti daytoy, inpakaammona nga itay laeng nabiit ket nagkiddaw ni Provincial Schools Division Supt. Dr. Joan Corpuz para iti pannakaipaay ti nayun a “text books” nga agdagup iti tallopulo a milyon a pisos.
Impalgakna a gapu iti daytoy ket kinddawna iti local finance committee wenno LFC a no adda pannakabalinna ket mailatang ti ad-adu pay a pundo para iti daytoy a banag.
Nupay kasta, imbatad ni Gob. Manotoc nga addan ti sangapulo a milyon a pisos a pakpakauna a naaprobaran.
Kunana a manamnama a maipaay ti nasao a nayun a text books iti masungad a tawen.
Inpanamnamana ti agtultuloy a pannakibinnulig ti gobierno probinsial iti Department of Education para iti ad-adda pay a panakapasayaat ti benneg ti edukasyon.
(Source: DepEd Ilocos Norte)