Nabenipisiaran ti siyam a gasut siyam a pulo ket siyam a kakailian ti siudad ti Laoag iti Assistance to Individuals in Crisis Situation wenno AICS.
Segun ken ni Gob. Matthew Marcos Manotoc, immawat ti tunggal maysa a benepisiario ti tallo ribu a pisos. Inbunannagna a naggapo ti naibunong a pundo manipud ken ni Sen. Imee Marcos.
Imbatadna a daytoy ti mangipamatmat a nupay addan iti senado ti inana a dati a gobernador ti Ilocos Norte ket saanna a malipatan ti mangipaay ti pagsayaatan dagiti kakaiian.
Kagiddan daytoy, impeksa ti gobernador ti napalaus a panagyamanna iti Department of Social Welfare and Development Regional Office ti rehion uno iti panangidanonda iti nasao a tulong ditoy siudad ti Laoag iti tulong ti Provincial Social Welfare and Development Office nga idadauloan ni Mrs. Lilian Rin.
Kabayatan ti nasao nga aktibidad, ginundawayan ni Gob. Marcos Manotoc a kinasarsarita dagiti kakailian.
Nupay kasta, kangrunaan a nakaawis ti imatangna ti maysa a lola nga agtawen ti nasursuruk ngem walopulo a taga Brgy. 7-B ditoy siudad ti Laoag. Inlawlawag ti maseknan nga indiaya ti gobernador ti panangtulong ti gobierno probinsial kenkuana babaen iti pannakapaoperana.
Nupay kasta, imbatadna nga adda ti palawag ti doctorna a saannan a kabaelan pay ti maoperaan gapu iti kinataengnan. Iti baet daytoy, inbilin ti gobernador ken ni Rin ti panangkitada no ania ti tulong a mabalin a maipaay ti probinsia iti nadakamat a lola. (Ronald Domingo)
(Source: Provincial Government of Ilocos Norte)