Mokabat sa P59 milyones ang giuyonan sa konseho sa syudad ubos ni bise mayor Kikang Uy nga gahin alang sa pagpatuman sa mga proyekto pagtukod og drainage system dinhi sa dakbayan sa Cagayan de Oro.
Nasukip niini ang 12 ka mga proyekto alang sa pagtukod og drainage system sa siyam ka mga barangay sa syudad.
Lakip sa gipundohan ug gilantaw nga mapatuman karong tuiga mao ang proyekto pagtukod og drainage system sa atubangan sa Balulang Elementary School paingon sa spillway, Ilaya, Balulang (P5 milyones); pagtul-id sa drainage dinha sa Apovel Subd, Bulua (P3 milyones); Macapagal Drive, phase 3 (P5 milyones); drainage system sa Moco, Carmen (P2 milyones); pagpalambo sa drainage dinha sa JR Borja Extn, Capistrano Complex, Gusa phase 2 (P5 milyones); rehabilitasyon sa Pasil drainage system sa Kauswagan P5 milyones); lateral drainage dinha sa Kauswagan-Bonbon Road, Kauswagan (P8 milyones); pagtul-id ug pagpalambo sa drainage system dinha sa Eagle St., Kauswagan (P10 milyones); drainage outfall sa 722 Subdivision, Lumbia (P4 milyones); drainage system dinha sa 8th St., Nazareth (P5 milyones); drainage gikan sa 4th St. paingon sa 21st St., Nazareth (P3 milyones), ug proyekto pagtukod og drainage gikan sa Puerto Market paingon sa Mindolog Creek, Puerto (P4 milyones).
Dako ang paglaum ni bise mayor Kikang Uy nga makatabang ang pagpatuman sa maong mga proyekto nga maminusan ang pagbaha pipila ka bahin sa syudad. (SP)