Mokabat sa 27 ka mga proyekto sa imprastraktura ang gipundohan sa 20% Development Fund (DF) sa dakbayan sa Cagayan de Oro alang karong tuiga.
Kini human giaprobahan sa milabayng tuig sa konseho sa syudad ubos ni bise mayor Kikang Uy ang balor P7.2 bilyones nga 2021 annual budget sa dakbayan diin balor P401.99 milyones ang gitagana alang sa mga proyekto ubos 20% DF.
Ang maong mga proyekto naglangkob sa pagpatuman sa flood control project balor P12 milyones; pagsemento sa mga dalan dinha sa Baikingon, Bayanga, Besigan, Cugman, Dansolihon, Lumbia, Pigsag-an, Tablon, Taglimao ug Tagpangi; pag-abli og dalan dinha sa Pamalihi-Malubog, Lumbia; pagtukod og flood mitigation structures sa Canitoan, Cugman, Tablon, FS Catanico, Gusa ug Iponan; P100 milyones nga paatbang pundo alang sa pagkompleto sa Lumbia ug Tablon Infirmary Hospital ug P45 milyones nga pundo alang sa pagkompleto sa ERID Isolation Facility dinha sa barangay San Simon. (SP)