Cagayan de Oro City – Kapin sa ₱ 3 bilyones o’ mokabat sa 41.40 porsyento sa kinatibuk-ang budget sa umaabot tuig 2021 ang gisugyot nga gahin alang sa economic services sa dakbayan sa Cagayan de Oro.
Kini ang unod sa executive budget nga gisumete ni mayor Oscar Moreno ngadto sa konseho sa syudad ubos ni bise mayor Kikang Uy.
Sa maong sugyot, kapin sa P70 milyones ang gitagana alang sa agricultural services, ₱ 42 milyones sa veterinary, ₱ 77.28 milyones alang sa environmental and natural resources concerns, ₱ 166.96 milyones alang sa operasyon ug pagmintinar sa engineering office ug ₱ 63.88 milyones alang sa city equipment depot.
Ang maong sektor naglakip sa 20% development fund nga mobalor og ₱ 401.99 milyones kun 20% sa madawat nga Internal Revenue Allotment (IRA) sa dakbayan.
Gawas pa niini, ang dugang ₱ 1.71 bilyones kapin nga sugyot pundo alang sa pagpatuman sa mga proyekto ug programa sa imprastraktura sama sa road system network aron maseguro ang hapsay nga pagbyahe sa mga batakang produkto ug serbisyo.
Gitinguha usab niini nga mapalambo ang connectivity ug mobility sa uban pang investment structures.
Dugang gisugyot nga mapahatan sa pundo alang sa sektor sa ekonomiya ang pagpalit og mga luna aron magamit nga resettlement sites balor ₱ 40 milyones, ₱ 850 mil nga pahat alang sa metropolization development ug ₱ 100 milyones alang sa pagtukod ug operasyon sa sanitary landfill.
Ang maong sugyot nga budget sa sunod tuig gipaabot nga tukion sa konseho sa pagsugod sa budget hearing karong bulana. (Sangguniang Panlungsod-CdeO)