Epektibo na ang resolusyon sa Sangguniang Panlalawigan nga temporaryong nagpahunong o pag-waive sa pagbayad og laboratory fee kung musulod sa lima (5) ka municipal hospital sa Sarangani Province, apil na sa Sarangani Provincial Hospital.
Sa rason nga tawhanon o humanitarian consideration gumikan sa krisis sa COVID-19, walay tarong pangita tungod sa gipatuman nga stay-at-home ug physical distancing, giuyunan nila Governor Steve Chiongbian Solon, Vice Governor Elmer De Peralta ug sa tanang board member nga undangon usa ang pagpaningil sa tanang laboratory charges ma-inpatient man o outpatient sa bisan unsang balatian.
Nakalatid sa Provincial Revenue Code sa Sarangani Province ang papel ni Provincial Health Officer Dr. Arvin Alejandro sa pag-rekomenda og temporaryong pag-suspenso sa pagsingil sa mga balayrunon sa tanang laboratory procedure sa mga hospital nga gidumalahan sa provincial government kung anaa ang entiro probinsya sa estado nga health emergency subay sa deklarasyon sa gobernador.
Adunay programa ang Sarangani nga “Tele-Konsulta” virtual medical consultation pagpa-konsulta sa doktor pinaagi sa linya sa telepono ug celfone, apan alang kini sa mga dili emerhensya ang kahimtang aron maiwasan ang panagtapok sa tao. Gidasig gihapon ang mga taga-Sarangani nga muduol sa mga municipal-provincial hospital aron hinanaling mahiling ang ilang mga gihambin nga gibati sa lawas pinaagi sa pagpailalum og laboratory test.
Ang mga pampublikong tambalanan sa Sarangani Province ang gilangkuban sa mga municipal hospital sa Maitum, Kiamba, Maasim, Malungon ug Glan, ug ang Sarangani Provincial Hospital nga nahimutang sa lungsod sa Alabel.