Cebu City – Duha ka tawo ang patay samtang usa ka menor de edad ang nawagtang sa baha ug lunop nga nasinati sa lainlaing bahin sa dakbayan sa Sugbo sa miaging gabii.
Suma pa sa mga awtoridad, ang usa sa mga nakalas mao ang 85 anyos nga si Flavio Detuya sa sityo Creek Side, brgy. Lorega-San Miguel.
Napalgan ang lawas ni Detuya nianang alas 10 sa gabii sa iyang balay nga naunlod sa tubig dihang miawas ang sapa sa brgy. Kamputhaw
Nakita sa imbestigasyon sa kapolisan sa Parian nga nalumos ang edaran dihang siya natanggong sa tubig nga misanap sa iyang balay.
Ang mga sakop sa first-aid team mida kang Detuya sa Cebu City Medical Center (CCMC) apan gideklarar nga patay nang nahiabot.
Unya gahapon sa kaadlawon, ang katawhan sa sityo Bakilid, Upper Laguerta, brgy. Lahug nakakaplag sa lawas ni Leonardo Otto sa duol nga creek.
Ang 48 anyos nga si Otto nga taga sityo Tarcom gitahong na-missing nianang gabii.
Nagtuo ang mga awtoridad nga buot unta ni Otto nga molabang sa sapa bisan nagdaot ang panahon.
Sa iyang bahin, si Ramil Ayuman, officer-in-charge sa CDRRMO o City Disaster Risk Reduction Management Office, nag-post sa Facebook bahin sa pagpangita sa 16 anyos nga nagpuyo sa General Maxilom Ave. nga nawagtang human giingong nabanlas sa baha.
(Jhon Tadlip/JTY, photo courtesy of Cebu City Disaster Risk Reduction Management Office)
(Source: Cebu City Disaster Risk Reduction Management Office)