Nagpaluwas nin bagong patakaran an Municipal Inter-Agency Task Force-IATF Baao sa mga lamay ini tanganing padagos na maka-ibitar sa nagdadakol na kaso kan covid-19.
Iyo ini an napagkasunduan matapos na gibohon kan nagtalikod na aldaw an meeting kan IATF Baao tanganing maresolberan an padagos na mass gathering asin iba pang okasyon na nagkakaigua nin suruksukan an tawo na sinasabing iyo an pinagpupunan kan local transmission.
Sa orolay napagkasunduan na bawal an ano man na mass gatherings kaiba na an birthday asin iba pang tiripon., alagad kun dai ini maiibitaran kaipuhan na limitado sana an numero asin immediate family sana an enbuelto.
Mientras tanto, sa lamay O bilar nin gadan, ipinagsugo man kan municipal IATF na limitado sana sa 10 personas an dapat na yaon sa bilar asin dai tutugutan an siisay na sanang mga bisita, asin limang aldaw sana an bilar asin kaipuhan na ilubong tulos-tulos an gadan.
Bawal man an ano man na sugal kaiba na an sakla asin baraha, mientras na an pag-inom dapat na limitado sana an numero asin tigsarong baso kun dai maiibitaran.
(OIC Melvin F. Barayoga, RPN DZKI Iriga)
(Source: LGU Baao)