Cebu City – Karon pang Hunyo 26 gitakdang sugdan ang pag-apod-apod sa hinabang salapi sa mga edaran sa dakbayan sa Sugbo.
Himoon ang distribution sa duha ka paagi – pinaagi sa cash cards ug house-to-house.
Base sa record, adunay 87,538 ka senior citizens ang siyudad nga gipaabot makadawat sa ayuda sugod sa Hunyo 26 pataas kutob sa napu ka adlaw way labot ang Sabado ug Domingo.
Tag- P3,000 ang madawat nga financial assistance sa mga senyor alang sa buwan sa Abril, Mayo, ug Hunyo.
Si Jeffrey Ocampo, pangu sa OSCA o Office of the Senior Citizens Affairs, miingon nga target nilang humanon ang distribution sulod sa duha ka semana.
Sanglit aduna nay kapin sa 13,000 ka senior citizens ang nagbaton og cash cards, menos na lang ang i-house-to-house sa mga sakop sa OSCA ug sa City Treasurer’s Office.
Sama sa naandan, gitambagan ang mga senyor nga anaa sa ilang bay nga mangandam lang sa tanang requirements lakip sa ID sa OSCA, bolpen, facemask, face shields, ug disinfectants. (Jhon Tadlip/.JTY)
(Source: Cebu City PIO, photo courtesy of Office of the Senior Citizens Affairs-Cebu City)