Muslim Holiday karong adlawa, adlaw nga Hwebes, Eid Milad (Maulidin Nabi) ngadto sa mga kaigsoonang Muslim – birthday of Prophet Muhammad!
Adunay pahimangno ang usa ka asymptomatic COVID-19 survivor taga-probinsya sa Sarangani. Mapasalamaton si ulius, kwarenta (40) anyos ang pangidaron, tungod wala kini sintomas. Dungan usab kini naguol nga basin hilum lang syang nakatakod sa iyang asawa ug anak gumikan wala syay gibati sa lawas.
Maayo na lang nag-negatibo ang iyang pamilya. Apan usa sa ilang kabanay usa ka senior citizen ang nakutluan intawon sa hinulamang kinabuhi. Gibutyag ni Julius nga natakdan kini sa maong kabanay tungod sya ang nagmaneho sa ilang sakyanan aron mahatud sa balay tambalanan.
Posibleng nakuha ang virus sa iyang kabanay gikan usab matud pa sa ilang tauhan nga adunay mga transaksyon sa Gensan Fishport. Panahon kini kadtong adunay pagtakdanay sa fishport sa Gensan.
Dise nuybe (19) ka adlaw nagtinir sa pribadong hospital sa Gensan ang ilang kabanay nga senior citizen. Sa pirmero, nagpakita kini og maayong senyales nga maka-recover apan wala gihapon nakalahutay sa kaulahian. Sama sa gikaingon nga traydor ang Coronavirus nga kalit ig-on ug paborito niining paluyahon kadtong huyang na ang resistensya.
Itandi sa pampublikong hospital nga dyutay ra ang mga bayrunon, adunay hospital bill ang kabanay ni Julius nga niabot og Usa Ka Milyon ka pesos (P1M). Maayo na lang nakatabang ang Philhealth ug ang discount sa pagka-senior citizen.
Sa kalayo matud pa sa Gensan ug sa munisipyo sa Sarangani Province nga ilang gipuy-an ug sa mga lihukon nga papeles, nag-desisyon na lang ang pamilya nga i-cremate kon sunugon ang lawas sa ilang pinalanggang kabanay. Pwede matud pang ilubong ang pisikal nga lawas apan sulod lang sa napulo (10) ka oras gikan sa pagkamatay.
Mensahe ni Julius, tinuod ang Coronavirus bisan dili kini makita maong seryosohon matud pa nga tumanon ang safety protocols nga padayong gipa-implementa sa gobyerno hilabi na sa LGU Sarangani sa pagpanguna ni Governor Steve Chiongbian Solon sa pagsuporta nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores.
(Provincial Information Office – Sarangani)