Inatasan na ng Philippine National Police (PNP) sa pangunguna ni OIC Pol. Lit. Gen. Archie Francisco Gamboa ang pagsisiyasat sa apat na pulis na sangkot sa kontrobersyal na buy bust operation sa Antipolo City.
Ayon sa tagapagsalita ng PNP na si Pol. Brig. Gen. Bernard Banac, kinumpirma ng Internal Affairs Service (IAS) na bukod sa pagkakasangkot ng apat sa Antipolo raid, ay sangkot rin ito sa kontrobersyal na drug raid sa Pampanga noong Nobyembre taong 2013.
Kinilala ang apat na police officers na sina Police Lieutenant Joven De Guzman, Police Master Sergeant Donald Roque, Police Master Sergeant Rommel Vital at si Police Corporal Romeo Encarnacion Guerrero Jr.
Magugunitang, inirekomenda na noon ni IAS Inspector General Alfegar Triambulo, ang dismissal order sa apat na pulis na sangkot sa mga naturang ilegal na aktibidad.
Samantala, hindi pa matiyak kung ito’y inaksyunan ni dating PNP Chief Oscar Albayalde.