Cebu City- Gisaway sa mga cause-oriented groups ang enactment o paghimong balaod sa Anti-Terror Bill ug mihagit sa mga magbabalaod nga Sugboanon nga isibog ang suporta niini sa naasoyng proposal.
Sa usa ka statement nga giduso sa media, ang tsirman sa AMA Sugbo-KMU o Alyansa sa mga Mamumuo sa Sugbo-Kilusang Mayo Uno, Jaime Paglinawan, miingon nga ang Anti-Terror Bill ang magtukmod sa bayolenteng pagbungkag ug pagpiit sa mga unyonista.
Matod ni Paglinawan, ang union busting ug violent dispersals sa mga lihok protesta ug welga daan nanghitabo na sa Pilipinas busa kon mahimong balaod ang Anti-Terrorism Bill, alang niya, mosamot pa kini.
Gipadayag sa grupo nga ang walay klarong pagsabot sa Anti-Terror Bill sa pung “terrorist” makahatag lang og hulga sa mga indibiduwal o grupo nga buot mopadayag sa ilang mga mulo ug yangungo sa gobyerno.
Alang sa AMA Sugbo-KMU, ang Anti-Terror Bill nakalapas sa Section 4 sa Bill of Rights sa 1987 Constitution, nga nanalipod sa libreng pagpadayag ug pagtukod og grupo.
Giingong nakalapas usab kini sa Section 18 nga nanalipod sa mga tawo gikan sa pagkatanggong tungod lang sa politikanhong mga panglataw ug pagtuod.