Cebu City – Usa ang patay ug laing napu ang naangol sa aksidente sa sakyanan sa lungsod sa Alcantara, Cebu gahapon sa buntag.
Nasayran nga nag-beach outing ang usa ka pamilya sakay sa van dihang nabangga sa usa ka motorsiklo hinungdang nakalas ang 14 anyos nga dalagita ug naangol ang laing 10.
Suma pa ni executive M/Sgt. Geraldine Veriarmente, ang babaye nga namatay naglingkod luyo sa drayber.
Matod pa ni Veriarmente, tungod sa impak sa pagkadasmag, nalagpot ang dalagita gawas sa van ug mitugpa sa kongkretong karsada.
Tungod sa dakong kadaot sa iyang ulo, nakabsan og kinabuhi ang 14 anyos.
Tulo ka menor de edad nga nag-edad og uno ngadto sa siete ang lakip sa 11 nga nasamdan sa aksidente sa national highway sa Barangay Palanas.
Nakita sa imbestigasyon nga usa ka pamilya ug ubang kabanay nagpaingon sa beach outing sa usa ka resort sa Moalboal gikan sa Cebu City.
Apan nianang alas 6 pasado sa buntag, samtang nagsubay sila sa national highway sa Barangay Palanas, ang drayber sa Nissan Urvan, Donald Mañeja, nawad-an og control sa sakyanan dihang misuway paglikay sa usa ka traysikad. (Jhon Tadlip/JTY)
(News & photo courtesy of Alcantara Police Station)