Davao del Norte – Pasiugdahan sa Mindanao Development Authority (MinDA) kauban ang laing tulo ka nasyonal nga mga ahensya ug ang lokal nga panggamhanan sa Davao del Norte ang “Adopt-A-Tribal Family” program.
Mahimong unang mga benepisyaryo sa programa ang 150 ka mga pamilyang Ata-Manobo gikan sa Sitio Tapayanon sa Barangay Gupitan, Lungsod sa Kapalong. Sila mahatagan ug desenteng puy-anan, proyektong pangkabuhian, edukasyon sa kabataan ug ubang kinahanglanong serbisyo nga wala pa gyod nila madawat gikan sa ilang pagkahimugso.
Ang “Adopt-A-Tribal Family” nga programa, gi-konsepto ug gi-desinyo sa MinDA alang sa mga sakop sa Ata-Manobo nga komunidad nga “nakalimtan” sa gobyerno kaniadto ug sila gitawag nga ‘Lost Tribe.’
Kini human sa diskusyon ni MinDA Chairman Manny Piñol kauban si Davao del Norte Governor “Kuya Gov” Edwin Jubahib ug Congressman Pantaleon Diaz Alvarez.
Ang ‘Lost Tribe’ nga komunidad aksidenteng nadiskubrehan sa Long Range Patrol team sa Philippine Army niadtong Pebrero 2019 ilawom sa kalasangan nga utlanan sa Davao del Norte, Agusan del Sur ug Bukidnon nga mga probinsya samtang naggukod sa mga komunistang rebelde nga New People’s Army kon NPA.
Panahon sa pagka-diskubre, ang komunidad kontrolado sa mga rebeldeng grupo. Ang ilang mga puy-anan hinimo sa poste nga kahoy samtang ang mga panit maoy bungbong ug walay timailhan nga naabot sa serbisyo sa gobyerno, bisan “anino” sa eskwelahan.
Ang mga lalaki lang ang panagsa nga makagawas sa tribo panahon nga sila magbaligya ug lanot gikan sa ihalas nga tanom nga abaca. Kinahanglan silang mobaktas ug duha ka adlaw ilawom sa kalasangan dala ang 15-30 kilos nga lanot padulong sa pinakaduol nga San Fernando, Bukidnon o sa Kapalong, Davao del Norte nga dala na ang asin, asukar, tabako ug bugas sa ilang pagbalik.
Sa paglunsad, kauban ni MinDA Chair Manny Piñol sila DSWD Secretary Rolando Bautista, TESDA Secretary Isidro Lapeña ug Indigenous People’s Commission Secretary Allen Capuyan nga mag-representar sa nasyonal nga panggamhanan samtang si Kuya Gov Edwin Jubahib, Bise-Gobernador Rey T. Uy, Kapalong Mayor Tess Timbol ug mga miembro sa provincial board ang magrepresentar sa lokal nga panggamhanan.
Ang duha ka mga representante sa probinsya nga sila Congressman Pantaleon Diaz Alvarez sa Distrito 1 ug Congressman Alan Dujali sa Distrito 2, gilauman nga anaa usab alang sa pinirmahay sa Memorandum of Agreement labot sa ‘Adopt-A-Tribal Family’ program.
Ang pasiunang hinabang nga naglakip sa mga binhi, gamit pagpanguma, pagkaon ug mga sinina itunol sab atol sa paglunsad.
Ang pribadong sektor labina ang mga dagkong korporasyon gilauman nga moapil pinaagi sa pag-adopt ug pamilyang tribo.
Ang mga programa sa pagtunol ug hinabang ug pag-atiman sa mga pobre ug mga napasagdang pamilya sa tribo giplanohan na usab nga himoon sa kinatibuk-ang Mindanao.
(davnorpickmo/noyg | MinDA | OIC Michael Manguhig, RPN DXKT Davao)