Umabot iti sangaribu nga agmanmaneho kadagiti pampasehero a lugan ti natulunganen ti gobierno probinsial babaen iti Metro Ilocos Norte Council (MINC) iti pannakaisayangkat ti cash-for-work wenno CFW program.
Imbatad ni Mr. Perry Martinez, Executive Director ti MINC a ti ad-adda a mabenipisiaran iti ‘Libre a Pagluganan’ Program ket dagiti frontliner workers.
Kunana a dagiti jeepney drivers a naikkan ti trabaho iti ‘Libre a Pagluganan’ ket bassit laeng rason nga inlungalongda kenni Gob. Matthew Marcos Manotoc a maipatungpal ti CFW program para kadagitoy.
Inlawlawagna a saan laeng a dagiti benepisiario ti natulungan iti cash-for-work program ngem ti intero a probinsia gapu ta nadalusan dagiti kanal ken dadduma pay a pagdalanan ti danum kas panagsagana iti panawen ti panagtutudu tapno saan nga alisto a malayus dagiti nadumaduma a lugar ditoy probinsia.
Inbunannagna a naisayangkat ti nasao a programa babaen iti pangkakammayet ti Provincial Social Welfare and Development Office, Provincial Environment and Natural Resources Office ken ti Office of the Barangay Affairs.
Segun ken ni Martinez, lima nga aldaw a nagtrabaho dagiti benepisiario ken immawatda ti sangaribu dua gasut dua pulo ket dua a pisos.
Kabayatanna, 15 a pampasahero a jeepney ti naideploy kadagiti napili a lugar nga agserserbi a pick-up ken drop-off points a pagluganan dagiti healthcare workers, non-medical fronliners, ken dagiti medical patients.
Imbatadna nga immawat met dagiti benepisiario a driver iti inaldaw a ‘’fuel subsidy’’ ken tallo gasut uppat a pulo a pisos a sueldo.
Innayonna nga apaman a maisursurat daytoy a damage ket umaboten iti siyam a ribu sanga gasut ket lima a frontliners ken tallo gasut sangapulo ket pito a pasiente ti naserbian iti ‘’free ride program’’.