Radio Philippines Network

50 Ka Mga Healthcare Workers Sa Sugbo Ipadala Karon Sa NCR Plus

Cebu City – Gipahigayon karong buntag, Miyerkules, Abril 7 ang send off ceremony sa Department of Health 7 alang sa 50 ka mga medical workers sa Cebu nga ilang ipada sa kaulohan karong adlawa aron pagtabang sa gobyerno pag-atubang sa nagkagrabeng pagkatap sa Covid-19.

Gilangkoban ang 50 sa 11 ka doctors, 35 ka nurses, ug upat ka medtech o medical technologists.

Sa gipahigayong ceremonial send off, mapasalamaton si Cebu City Mayor Edgar Labella sa gipakitang voluntarism sa mga medical frontliners bisan pa man sa hazard nga ilang atubangon.

“Pls bring with you our prayers,” mensahi ni Labella.

Mitambong sa maong ceremony sila si Office of the Presidential Assistance for the Visayas OPAV Secretary Michael Dino, Cebu Provincial Governor Gwen Garcia, mga opisyal sa Syudad sa Sugbo uban ni Cebu City Mayor Edgar Labella, Vice-Mayor Michael Rama ug mga kaubanan.

Lakip sa mitambong ang labaw sa VSMMC Dr. Gerardo Aquino Jr.

Suma pa sa tigpamaba sa DOH 7, Dr. Mary Jean Loreche, gitakda silang molupad sa Manila karong adlawa.

Ang naasoyng mga healthcare workers gikan sa VSMMC o Vicente Sotto Memorial Medical Center sa Cebu City ug sa DOH-7.

Matod ni Loreche, gi-schedule silang mangadto sa Manila karong alas 3 sa hapon.

Nang-hire ang DOH-7 og mga healthcare workers aron ipada sa NCR diin misulbong ang mga kaso sa COVID-19.

Midugang si Loreche nga nagplano sila pagpadapa og dugang healthcare workers sa NCR karong umaabot nga mga adlaw sanglit nagkinahanglan man ang maong rehiyon og 100 ngadto sa 200 ka nurses aron pag-abag nga mous-os ang outbreak sa manageable levels.  (Jhon Tadlip/JTY)

(Source: DOH 7, photo courtesy of OPAV)

Exit mobile version