CAGAYAN DE ORO CITY- Usa ka opisyal sa Department of Interior and Local Government (DILG) nag-awhag sa mga local government executives sa region 10 sa higpit nga pag-utilize sa ilang share nga P1,276 bilyones pesos sa “bayanihan” grant diin kini gipagula sa Department of Budget and Management. Sa maong kantidad moabot sa P510.4 milyones ang gigahin alang sa pagsagang sa impact sa coronavirus disease (Covid-19) nga naa pa sa mga bank accounts sa provincial, city ug municipal governments sa Northern Mindanao.
Matud ni DILG-10 Assistant Regional Director Yvette Tolentino Sunga sa usa ka press briefing nga kinahanglan magasto 100% ang bayanihan kay kon dili kini matandog tapos sa pagdeklara sa state of calamity, kini mahibalik sa national treasury.
Niadtong adlaw nga Biyernes, nasayran nga ang syudad sa Cagayan de Oro nakagasto na sa 74% sa bayanihan grant collection nga moabot sa P156,283,838 samtang ang Iligan City naka-utilize na sa 79% sa P137,604,081 sa gidownload nga kantidad.
Subay sa budget circular, ang bayanihan grant gihimo aron ang local governments makadugang sa gikinahanglan sa mga hospitals sa tagsatagsa ka dapit apil na sa pagpamalit sa personal protective equipment, medical equipment, laboratory, reagents, test kits, medisina ug bitamina.
Ang unom ka bulan nga deklarasyon sa state of calamity nagsugod niadtong Marso 16 ning tuiga ubos sa Presidential Proclamation No. 929, lima ka adlaw human ang World Health Organization miila sa Covid-19 nga pandemic.