Nakadawat karon sa ilang indemnification cash assistance gikan sa syudad ang 36 ka mga mag-uuma sa barangay San Simon human naapektuhan sa African Swine Fever ang ilang backyard piggeries.
Matag usa nakadawat og ₱ 2,000 kada baboy nga na-cull isip kabahin sa indemnification fund sa syudad ngadto sa mga apektadong backyard hog raisers ug kini nagkantidad sa ₱ 274,000.00 alang sa 137 ka mga baboy nga gi-cull.
Gibutyag ni Paul Douglas Calingin, Officer-in-Charge sa Agricultural Productivity Office (APO) nga miaging semana, ang mga personahi sa City Veterinary Office nagkuha og blood samples sa mga baboy diha sa Barangay Agusan ug Pagatpat ug nagpaabot na lang sa resulta.
Samtang karong semana, laing blood samples sa mga baboy gikan sa Barangay Lumbia, Upper Puerto, Bugo, ug Macasandig (Buena Oro) ang gikuha.
Nagpahigayon na og profiling ang mga personahi sa APO ug City Vet diha sa Barangay Baikingon human gikataho nga adunay nagpositibo sa ASF.
Giplastar na usab ang mga checkpoints aron mabantayan dili lang ang mga baboy sulod sa syudad apan lakip na ang gikan sa laing lugar nga mosulod sa Cagayan de Oro.
Gani gipadayag ni Mayor Oscar Moreno atol sa press briefing karong adlawa nga andam na ang iyang Executive Order aron palig-onon ang nagkadaiyang checkpoints sa syudad.
(City Information Office-CdeO)