Maayo ang kahimtang sa 35 ka mga estudyante sa “Community Technical College on Southern Mindanao (CTCSM)” diha sa Maco nga karon gipailalom sa 14-Day Quarantine sa probinsya, ug negative sad silang tanan matud ni Gov. Jayvee Tyron Uy sa Rapid Test nga gihimo sa mga health care providers sa gobyerno.
Gisulti kini sa gobernador atol sa iyang pagpartisipar sa “One Davao on CoViD 19: Virtual Presser” nga gipasiugdahan sa PIA Regional Office XI kauban sila PIA Region XI Dir. Frances Mae G. Macapagat, PIA Davao De Oro Manager Michael Uy, ug Reporter sa Sunstar Davao.
Miadtong Mayo 16,2020 ang Provincial Inter-Agency Task Force on Emerging Infectious Diseases(PIATF-EID) nagpadala sa mga Opisyal sa DepEd, sa mga Social Workers, ug sa mga sakop sa PHO aron pagsundo sa nahisgotang mga estudyante sa CTCSM nga na stranded diha sa eskwelahan sulod na sa kapin kon kulang duha ka bulan.
Pinaagi sa iyang sulat, ang school administrator opisyal nga nag turn-over sa maong mga estudyante ngadto sa probinsya tungod matud pa niya nga iyang nasabtan nga kini para sa ilang kaayohan.
Naa na karon sila sa bag-o nahumang BFP Training Center sa kapitolyo nga sa pagkakaron maoy gihimo nga COVID-19 Quarantine Facility sa Davao De Oro.
Dugang sa komportable ug nindot nga pasilidad ang mga masustansya nga pagkaon nga ginahatag kanila matag-adlaw. Gihatagan sad sila ug mga hygiene kits ug uban pa nilang personal nga mga panginahanglan.
Adunay physical exercises, spiritual activities, film viewing, ug mga impormasyon sama sa COVID19 samtang anaa sila sa pasilidad kauban ang mga Social Workers ug Frontliners nga nagtinabangay pag-atiman kanila. (DDO Provincial Information)
