Zamboanga del Sur – Personal nga gisaksihan ni Gov. Victor Yu ug Deputy Speaker Cong. Divina Grace Yu ang pagpresentar sa ebidensya gikan sa mga naarestong suspek nga nakuhaan og 500 gramos nga drogang shabu nga nagkantidad og ₱ 3.4 milyones atol sa gilusad nga buy-bust operation sa PDEA ug PNP karong hapon, Hulyo 8, sa Purok Dona Aurora, Poblacion, Aurora, Zamboanga del Sur.
Naila ang mga suspek nga sila Jamael Omar, residente sa Iligan City, Lanao del Norte ug Salimah Ampuan, residente sa Marawi City, Lanao del Sur. Nasayran nga gisulod sa lima ka dagkong plastic cellophane ang nakumpiskang droga.
Ang maong accomplishment sa kapulisan ug sa PDEA usa ka timaan sa ilang kaabtik sa pagsumpo sa ilegal nga droga sa probinsya isip kabahin sa kampanya ni Pres. Rodrigo Duterte.
Ang administrasyon ni Gov. Yu hugtanong nagmando sa mga law enforcers ning lalawigan nga tutokan ug batukan ang padayong transaksyon sa ilegal nga kalihukan.
Suportado usab ni Gov. Yu ug Cong. Yu ang PNP pinaagi sa paghatag kanila og mobility and logistic support aron mas mahimo nila ang ilang gipanumpaang trabaho sa pagpatunhay sa kahusay ug kalinaw sa Zamboanga del Sur. (Joey S., photo courtesy of ZSPPO)