Nahibaw-an na sa Department of Health kun DOH 7 ang nahimutangan sa 26 ka Koreano nga ming-abot sa Sugbo niadtong Peb. 25 gikan sa Daegu City, North Gyeongsang Province, South Korea.
Kini ang gitug-an sa direktor sa DOH 7, Dr. Jaime Bernadas, atubangan sa mga reporter.
Matod ni Bernadas, ilang nasubay ang mga turista nga mingtsek-in sa mga hotel sa dakbayan sa Sugbo ug Lapulapu.
Pero sumala pa ni Bernadas, wa pa siya mahibawo asa kini ikwarantina kay nagpaabot pa siya sa final report sa mga health offices sa duha ka siyudad.
Giklaro sa DoH 7 nga ang 14 ka Koreano anaa sa hotel sa dakbayan sa Sugbo ug ang 12 sa Lapulapu.
Miugang si Bernadas nga kay anaa man kini sa mga hotel ilang gihangyo ang tagdumala sa hotel nga kon mahimo, sa hotel room na lang sila ikwarantina.
Apan wala pa hinuoy nadawat ang DOH nga approval gikan sa management sa mga hotel.
Gitataw usab ni Bernadas nga ang mga turista gipaubos na sa monitoring kun Persons Under Monitoring (PUM) sanglit gikan man kini sa dapit nga aduna nay mga kaso sa corona virus kun Covid 19