Cebu City – Nakatala ang Department of Education o DepEd-7 og 25 ka pribadong tunghaan sa basic education sa rehiyon nga naka desidir nga di una mangabli sa school year 2020-21.
Apan si Dr. Salustiano Jimenez, director saDepEd-7, miingon nga adunay usa ka eskuylahan nga mipili nga manera na sa hingpit tungod sa grabeng epekto sa coronavirus disease o Covid-19 pandemic.
Hinuon, giawhag ni Jimenez ang mga tunghaan nga temporaryong mihunong sa operation nga motabang sa ilang mga tinun-an nga mamalhin sa ubang schools pinaagi sa paghatag sa gikinahanglang requirements ug documents.
Alang sa director, ang paghimo sa ingon makapasayon sa mga estudyante pagtapon sa ubang eskuylahan.
Midugangsi Jimenez nga obligasyon sa nanera nga mga tunghaan ang pag-abag sa mga ginikanan pagbalhin sa mga anak niini sa laing schools.
Gimandoan usab ni Jimenez ang eskuylahan nga hingpit nang nanera nga iduso ang records sa mgatinun-an sa division office sa DepEd.
Kini aron sayon ra nila ang paghatag kon naay mga ginikanan nga mangita.
(Jhon Tadlip/JTY, photo courtesy to John Cyril Mahinay)
(Source: DepEd – 7)