Misaka na sa 21 ang kaso sa pagpamusil ang natala sa General Santos City, sulod sa lima ka bulan lamang.
Base sa datus sa General Santos City Police Office, sa maong mga insidente, upat ang nahitabo karong bulan sa Hunyo, diin, usa ka construction worker ang pinaka-bagong biktima.
Giila sa GenSan City Police Office ang biktima nga si Benjie Umpak, residente sa Lun Padido, Malapatan, Sarangani province, kansa nakaagom og samad pinusilan sa iyahang tiyan nga bahin, gikan sa wala pa mailhing suspek.
Base sa pamahayag sa mga kaubanan sa trabaho, kalit na lamang matod pa silang nakadungog og buto sa pusil, dayon ilahang nakit-an ang pagbuy-od sa biktima.
Nadala pa sa balay-tambalanan si Umpak apan nakabsan gihapon kini sa iyahang kinabuhi.
Nahitabo ang insidente takna alas-9:00 sa buntag sa bahin sa Bulaong Avenue sa Barangay Dadiangas West.
Kahinumduman nga ning miaging semana, halos magkasunod nga adlaw nga gipusil ang usa ka tricycle driver, usa ka negosyante ug female executive officer sa usa ka dakong media company sa siyudad.
Atol sa pakighinabi sa RPN DXDX ??????, gipaniguro ni GSCPO chief, P/Colonel Gilberto Tuzon nga wala nagpasagad ang kapulisan sa ilahang trabaho aron mahatagan og kasolbaran ang maong mga krimen.
Subli usab miapela ang opisyal sa publiko sa igong kooperasyon alang sa ika-hapsay og kalinaw sa siyudad. (John Rey Somido)