Cagayan de Oro – Gipahalipayan sa administrasyon ni Mayor Klarex Uy ang kalampusan nga naangkon sa duha ka boksidor sa Cagayan de Oro City amateur boxing team kinsa nagmalampuson sa ilang pagsalmot sa usa ka international boxing competition didto sa nasud sa Taiwan.
Ang duha ka batan-ong boksidor, kinsa mga miyembro na karon sa RP national boxing team, mao sila si Nick Anjelo Payla ug Xian Baguhin, pulos nag-edad og 17 anyos, ug mihakot og tagsa-tagsa ka gold medals sa bag-ohay natapos nga 2024 Taipei City Cup Boxing Tournament didto sa Taiwan.
Ang duha pormal nga gipresentar ni Acting City Sports Development Program Coordinator Albby Cris ‘Bheng’ Waga atubangan kang City Mayor’s Chief of Staff Sheila Lumbatan, Bise Mayor Jocelyn ‘Bebot’ Rodriguez ug pipila ka mga sakop sa 20th City Council atol sa pagpakayab sa nasudnong bandila sa city hall Lunes sa buntag.
Matud pa ni Team CdeO Boxing head coach Elmer Pamisa nga si Payla, ang gold medalist sa Cebu City Palarong Pambansa, ang napili usab nga ‘Best Boxer’ sa maong boxing tournament.
Mapasalamaton usab si Coach Pamisa sa makanunayong suporta ni Mayor Klarex Uy sa Team CdeO boxing team nga maoy nakadiskubre ug miumol sa talento ni Tokyo Olympics silver medalist Carlo Paalam.
News and photo by CIO CDO