CAGAYAN DE ORO CITY- Laing duha ka tawo gikan sa Cebu ang pinakaulahing kaso sa coronavirus dinhi sa Cagayan de Oro, matud pa ni City Health Office Epidemiologist Dr. Joselito Retuya. Mao kini ang nakapahimong 26 tanan sa positive cases sa Covid sa syudad.
Usa niini ang 55 anyos nga babayeng residente sa barangay Pagatpat ning dakbayan, kinsa nastranded sa Talisay City, Cebu tungod sa lockdown samtang siya ug ang iyang anak nagbakasyon. Ang maong babaye nahidangat sa syudad niadtong Hunyo 13 ug mipailawom sa rapid diagnostic test ug na swab niadtong Hunyo 19 sa isolation unit sa Cagayan de Oro. Ang resulta migawas niadtong Hunyo 20 nga positibo.
Matud pa ni Dr. Retuya nga nagpabiling asymptomatic sa pagka karon ug gitransfer na kini sa isolation unit alang sa Covid-positive patients.
Ang lain pang bag-ong positibo sa kaso sa Covid mao ang 63 anyos nga seafarer nga taga Iponan ning dakbayan nga nastranded gihapon sa Cebu. Kini ubos na sa kwarentina ug nakasakay sa barko pauli sa Cagayan de Oro niadtong Hunyo 11. Niagi na gihapon kini sa rapid diagnostic test ug naswab na diin ang resulta nga positibo migula niadtong nakalabay nga adlaw.
Gisugilon ni Retuya nga aduna nay 25 ka mga close contacts, tanan pulos kasakay sa 63 anyos sa barko ang ila nang nailhan.