Cagayan de Oro – Mga ekipo sa agrikultura ug mga plastic crates ang gitunol sa administrasyon ni Mayor Rolando `Klarex’ Uy pinaagi sa Agricultural Productivity Operations Office (APOO) ngadto sa duha ka asosasyon sa mga mag-uuma sa Barangays Tablon ug Balubal.
Nakadawat og usa ka unit nga hand tractor multi-cultivator ug 92 ka unit nga plastic crates ang Kiapo Palalan Farmers Irrigators Association (KIPAFIA) sa Barangay Tablon.
Samtang ang Balubal Integrated Social Forestry Farmers Association Inc. (BISFFA) gihatagan og usa ka unit nga Corn Sheller.
Si Engr. Paterno Gonzales, department manager sa APOO namahayag nga ang maong inisyatibo inabagan sa Department of Agriculture (DA-10) isip kabahin sa makanunayon nga pagsuporta sa programang agrikultura sa syudad.
Gani, gikan man sa pundo sa nagkadaiyang programa sa DA gikuha ang gitunol nga mga ekipo.,
Nunot niini, gipasalamatan ni Mayor Klarex ang DA uban sa ilang mga kadagkuan sa padayon nga pag-abag sa mga programa sa syudad alang sa mga mag-uuma sa tinguha nga mapalambo ang ilang produksyon ug panginabuhian.
News and photo by CIO CDO