Aron mahatagan og klaro nga direksyon ug paagi nga makab-ot ang targets para sa tuig 2021, ang Department of Environment and Natural Resources (DENR) pinaagi sa opisina sa Assistant Secretary (ASec) for Field Operations – Mindanao and Legislative Affairs nagpahigayon sa 1st DENR Mindanao Command Conference Cum Strategic Planning karong bag-o dinhi sa syudad sa Cagayan de Oro.
Ang kalihukan gipangunahan ni ASec Lagunda ug gitambungan sa mga DENR Mindanao Regional Executive Directors, Regional Directors of Environmental Management Bureau ug Mines and Geo-sciences Bureau, ug Assistant Regional Directors for Management and Technical Services.
Sa iyang mensahe, si ASec Lagunda nipadayag nga kinahanglan adunay hustong stratehiya aron mouswag ang sistema ug dugang pa nga pag-usbaw sa paghatag og maayong serbisyo sa publiko. Siya nidasig sa mga partisipante nga ibutang sa ilang kasing-kasing ang DENR Core Values nga mao ang Discipline, Excellence, Nobility ug Responsibility diin kini makita sa pagsuot sa office uniform ug Identification Card sa opisina.
Sa iyang pasiunang mensahe, si Regional Executive Director Arleigh J. Adorable niabi-abi kang ASec Lagunda ug sa mga partisipante sa kalihokan. Iyang gihatagan og importansya ang pagprotektar sa mga kabukiran sa Bukidnon. Siya nidugang nga ang Northern Mindanao mao ang tinubdan sa tubig padulong ngadto sa Cagayan de Oro River Basin, Tagoloan River Basin ug Cotabato River Basin.
Si ASec Lagunda nagpahigayon usab og mini-workshop aron pag-ila sa gitutukan nga programa karong tuiga. Gidapit usab niya ang team sa National Bureau of Investigation (NBI) – Environmental Crime Division aron pagtuki sa gihiusang operasyon sa pag-implementar ug pagpatuman sa ENR laws, rules and regulations sa DENR offices ug ang ilang Bureau. Ang mga halangdon nga kaso ila usab nga gihisgutan atol sa command conference.
Ang Mindanao Regional Executive Directors ug Regional Directors sa Environmental Management Bureau ug Mines and Geo-sciences Bureau nipresentar usab sa ilang mga plano ug programa ug ang mga issues and concerns para sa 2021 ug nagpreparar sa lima ka minuto nga video presentation mahitungod sa ilang mga kabag-ohan nga gihimo sa ilang tagsa-tagsa ka kamanduan sa wala pa nagpresentar sa ilang targets sa tuig 2021. (DENR-10 Media Affairs Office)