30.9 C
Manila
Friday, March 29, 2024

108 All-Time Covid-19 Recoveries Natala Sa Sarangani Province, Antigen Swab Test Epektibo Aron Dili Na Makapanakod

- Advertisement -




Human sa setenta (70) kabuok one-time naka-recover sa COVID-19 sa probinsya sa Sarangani bag-uhay lang, laing siento otso (108) na usab ka mga indibidwal, tanan taga-lungsod sa Alabel, ang naka-recover. Basi kana sa datus nga gipagawas sa Department of Health kagabii, as of May 27, adlaw nga Huwebes.

Anaa sa ikaduhang pwesto ang Sarangani Province nga adunay ubos ang total confirmed cases sa entiro Region 12. Nag-una ang dakbayan sa Heneral Santos nga adunay 639 aktibong kaso, South Cotabato 600, North Cotabato aduna silay 412 active cases, 301 ang Sarangani, ug 207 sa Sultan Kudarat.

Samtang, nag-una usab ang Gensan nga may daghang nangamatay nga konektado sa Coronavirus, niabot na sa 118. Labing ulahi ang Sarangani, baynte singko (25) kabuok.

Posible pang musaka ang ihap sa positibong kaso sa Sarangani tungod sa nagpadayon karon nga Risk-Based Targeted Testing sa tibuok probinsya, sa kamanduan ni Governor Steve Chiongbian Solon. Proactive kini nga pamaagi masiguro nga paspas makit-an, masuta, ma-kwarantina ug ma-isolate ang mga person of interest aron dili na makatakod sa uban. Kaysa pasagdan ug hulaton na lang kung kinsa ang maningog nga nakasinati na sa kabangis sa virus.

Segun ni Dr. Arvin Alejandro, ang provincial health officer, nakatutok ang ilang massive testing sa mga lugar nga taas ang nangatakdan og COVID-19. Nagagamit ang provincial ug municipal diagnostic and testing support teams og Antigen swab test aron paspas mabal-an ang resulta.

Rason nga bisan wala pa mugawas ang resulta sa RT-PCR swab test, una nang naka-quarantine ug napalayo na sa iyang pamilya ug mga higala ang tao. Dugay nang napamatud-an nga nagahatag og saktong resulta ang Antigen swab test. Apan tungod sa palisiya sa Department of Health nga kinahanglan adunay mukumpirma sa resulta, nagpabilin ang RT-PCR swab test nga confirmatory test.

Duha (2) ka swab test ang ginabuhat sa Sarangani Province panigurado nga tama ang makuha nga datus, sa direktiba ni Governor Solon katugbang ang pito (7) ka mayor ug sila Vice Governor Elmer De Peralta, tanang board member ug Senador Manny ug Congressman Ruel Pacquiao. Pang-kontra kini sa tsismis nga i-deklara dayong COVID ang simple nga flu. Lahi man ang virus sa ordinaryong flu, lahi ang Coronavirus.

Hinungdan usab nga sensitibo ug kinahanglan tumanon ang katorse (14) ka adlaw nga kwarantina gumikan sa pagka-traydor sa Coronavirus. Matud pa ni Dr. Alejandro, posibleng negatibo ang makuha nga resulta sa ika-napulo (10th) nga adlaw gikan sa pagkatakod. Apan pag-abot sa ika-katorse (14th) ka adlaw, positibo na diay. Tungod kana sa average incubation period sa Coronavirus nga muabot og katorse ka adlaw gikan sa pagka-igo. Maong bantayanan.

Patay na ang board member sa South Cotabato, si Board Member Wilson Paclibar, tungod sa COVID-19. Namatay kini sa komplikasyon sa Coronavirus sa edad pa lang nga kwarentay syete (47) anyos.

Patay pud sa COVID ang mga inila nga tulo (3) ka Katolikong pari sa syudad sa Cotabato. Nakutluan sa kinabuhi sila Father Eliseo Mercado, setentay dos (72) anyos, Father Loreto Sanoy, setentay otso (78) ang pangidaron, ug Father Rex Bacero, singkwentay dos (52) ang edad. Halos nagsunod lang ang mga adlaw sa ilang pagkapatay sulod sa Cotabato Regional Medical Center. (John Rey Somido)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -