Davao de Oro – Malipayong gidawat mismo ni Gov. Jayvee Tyron Uy kagahapong adlawa (Dec.1, 2020) sa kapitolyo ang 10,000 ka mga Face Shields nga gi donate sa Rotary Club of Tagum North panahon sa gihimong Joint Activity kauban ang Rotary Club of Compostela Valley.
Sa Province of Davao de Oro hugot nga gi dili ang pagsuroy sa pampublikong mga lugar nga walay Face Mask ug Face Shield ilalom sa Provincial Ordinance no. 74-2020 nga naaprobahan bag-o lang sa SP Davao de Oro sa pagpanguna nila ni Vice Gov. Maricar Zamora ug Senior Board Member Arturo “Chiongkee” Uy.
Ilalom sa maong ordinansa makamulta og P500.00 ang usa ka pribadong individual nga mosuroy sa pampublikong mga lugar sa Davao de Oro nga walay Face Mask ug Face Shield.
Doble ang multa niadtong mga empleyado ug trabahante sa Gobyerno nga magmalapason. Samtang, ang mga establisimento ug pamatigayon nga makalapas niini pabayron og multa nga ₱ 1,000.00 – ₱ 2,500.00 para sa ilang 1st, 2nd, and 3rd Offense.
Gipaneguro ilalom sa maong ordinansa nga ang tanang mga katawhan sa Davao de Oro hugot nga motuman sa Minimum Public Health Standards nga gimando sa Department of Health (DOH) aron mapugngan ang tinakdanay sa Covid-19 Pandemic.
Ang Provincial Ordinance no.74-2020 kon “An Ordinance Requiring the Mandatory Use of Face Mask and Face Shield, and The Observance of Minimum Health Standards in the Province of Davao de Oro” naaprobahan bag-o lang pinaagi sa boto nga unanimous gikan sa tanang SP Members nga mitambong atol sa ilang 69th Regular Session.
(Gilbert M Cabahug, PAO-ID DdO, photo courtesy by ADayao)