10 Units Dialysis Machines Gikan Sa DOH Ug Expanded Dialysis Clinic, Gisubhan

10 Units Dialysis Machines Gikan Sa DOH Ug Expanded Dialysis Clinic, Gisubhan

by RPN
69 views

Isip tubag sa panginahanglanun sa maayong panglawas dinhi sa probinsya, gisubhan ang napulo ka dialysis machines ug ang Expanded Dialysis Clinic sa Zamboanga del Norte Medical Center kaniadtong Pebrero 26.

Ang maong 10 ka dialysis machines gi-donar kini sa Department of Health (DOH).

Sa mensahe ni Governor Roberto Uy, gipaabot niya ang dakong pagpasalamat ngadto sa Department of Health sa paghatag sa maong ekwipo  diin dako kini’g ikatabang sa katawhan sa probinsya.

Dugang ni Governor Uy nga bisan daghan motamay ug modaut kaniya, nagpabilin gihapon nga lig-on ug matinud-anon ang gobernador sa iyang pagserbisyo sa katawhan.

Ang nadawat nga dialysis machines gikan sa DOH bunga sa maayo ug limpyo nga pagdumala sa probinsya.

Gani naglaraw si Governor Uy nga mopalit pa ug dugang dialysis machines ang kagamhanang probinsyal aron matubag ang panginahanglanun sa renal partients.

Samtang si Dr. Joshua Brillantes, ang Assistant Regional Director sa DOH Region IX, iyang gipahalipayan ang Zamboanga del Norte  gumikan sa paningkamot  sa adiministrasyon ni Governor Uy nga makaagkon niining maong dialysis machines.

Gidayeg ni Dr. Brillantes si  Governor Uy sa iyang pagpakabana kalabot na sa maayong panglawas ug paghatag sa tukmang serbisyo ilabi na  sa katawhan nga nagkinahanglan ug dialysis.

Gibutyag usab ni Dr. Brillantes  nga ang Zamboanga del Norte maoy unang nahatagan sa maong medical equipment gikan sa DOH dinhi sa Zamboanga Peninsula.

Dugang ni Dr. Brillantes nga bisan paman adunay dugang dialysis machines, nanghinaut lamang siya nga mokunhod ang gidaghanon sa pasyente nga mogamit niining maong machine aron mamahimo pang produktibo ang tawo.

Samtang si Dr. Ida Grace Ramo, ang Head sa Dialysis Clinic ang nagkanayon usab nga adunay 27 ka machine ang migana sa maong clinic, apan dili pa kini maka-cater sa 117 ka pasyente nga nakalista sa log book.

Niini, nagpasalamat si Dr. Ramo ngadto ni Governor Uy sa paningkamot nga maangkon ang maong dialysis machines gikan sa DOH sanglit dako kini’g ikatabang sa katawhan sa probinsya ilabi na ang NBB patients.

Mipaabot usab sa iyang dakong pagpasalamat si Dr. Esmeralda Nadela, ang Acting Hospital Administrator ngadto sa DOH ug ngadto ni Governor Uy sa walay puas nga suporta sa pag-improbar sa serbisyo sa Zamboanga del Norte Medical Center.

Gani, nagtuo si Dr, Nadela nga imposible nila kining maangkon sanglit daghan ang gipangayo nga rekisitos, apan inubanan sa ilang pag-ampo, nahimong realidad kini.

Ang Blessing and Inauguration of the Newly Expnaded Dialyusis Clinic ug 10 units dialysis machines gitambungan ni Vice Governor Senen Angeles, Board Members, doctors sa maong tambalanan, PCSO, Philhealth ug mga hepe sa buhatan sa kagamhanang probinsyal.

 

0 comment

Related Posts