Maga personajes del Criminal Investigation and Detection Group (CIDG) ya aresta con un persona por el asunto de ilegal posesion de armas de fuego na ciudad de Dipolog, Zamboanga del Norte.
Si Coronel John Francis Encinareal, el hefe del CIDG na rehyon, ya nombra con el arestao suspechao como si Rolando Otic, cuarenta’y siete anios el edad.
Si Encinareal ya habla cay con Otic ta aresta durante un implementacion del mandato de busca (search warrant) del Huwebes na Barangay Biasong, ciudad de Dipolog.
Asegun con Encinareal cay ya confisca na residencia de Otic un calibre treynta’y ocho revolver con seis bala que ya pone adentro de un bolsa de cintura (belt bag).
Con Otic ya detene temporaryamente na quartel del pulisiya del ciudad de Dipolog, Zamboanga del Norte. (Bong Garcia, Jr., photo courtesy of Criminal Investigation and Detection Group IX)