Un espiya del New People’s Army (NPA) ya rindi con maga autoridad del ayer aga, Huwebes, alla na Barangay Dipawak, Dumingag, Zamboanga del Sur.
Si Coronel Richard Verceles, operations chief del Area Police Command-Western Mindanao, ya nombra con el espiya del NPA quien ya rindi como si Efren Medina, Sr., sesenta’y cuatro años el edad.
Asegun con Verceles cay el rindida de Medina ya ase posible na esfuerso del maga pulis y soldao siguiendo el serye de negosacion.
Asegun con Verceles cay si Medina, puera como un espiya, ele tamen el ta lleba maga comida y otro necesidades del maga rebelde NPA na Sitio Kumpayan, Barangay Dipawak, Dumingag.
Na un simple ceremonya, ya jura si Medina cay ay esta ya le fiel con el govierno del pais.
Con Medina ya entrega con buen salud na custodiya del su hija, si Nova Jane, quien un elejido official del Barangay Dipawak. (Bong Garcia, Jr., photo courtesy of Area Police Command- Western Mindanao)