Un myembro del grupo Abu Sayyaf el ya rindi con maga autoridad Miyerkoles aga alla na provincia de Basilan.
Si Coronel Frederick Sales, el diputado comandante del Joint Task Force-Basilan, ya nombra con el Abu Sayyaf que ya rindi como un tal Tuttuh, un residente de Sitio Bohe Suyak, Barangay Sungkayot, Ungkaya Pukan, Basilan province.
Ya entrega si Tuttuh un calibre treynta’y ocho revolver cuando ya rindi ele con maga personjes del military.
Asegun con Sales cay si Tuttuh ya rindi por medio del esfuerso del maga intelligence personnel del Army y Air Force, quien ta ase maga pacifico manera para convinsi con el maga restante bandido Abu Sayyaf para rindi.
Asegun con Tiniente Heneral Alfredo Rosario, Jr., el comandante del Western Mindanao Command, cay con dos mano sila ta recivi con maga myembros del Abu Sayyaf queien ta decidi rindi y vivi nuevo y un pacifico vida.
Si Rosario ya dale el coraje con el maga restante myembros de Abu Sayyaf para rindi y uni con el govierno para mejora el seguridad and desarollo del provincia del Basilan. (Bong Garcia, Jr., photo courtesy of Western Mindanao Command)