Ya anuncia el Department of Social Welfare and Development (DSWD) cay tiene el suma total de tresientos sincuenta’y sinco estudiantes el ya recivi mas de un milyon pesos ayuda financial desde el agencia del Sabado aqui na ciudad de Zamboanga.Asegun con el portavoz del oficina rehyonal del DSWD Ivan Eric Salvador cay aquellos quien ya recivi ayuda financial compuesto de sesenta’y ocho estudiante de elementarya; cuarenta’y sinco, secundarya; cuarenta’y nueve, escuela secundarya superior (senior high school); y siento noventa’y tres, colegio.
Cada uno del maga estudiantes de elementarya ya recivi mil peso; secundarya, dos mil pesos; escuela secundarya superior, tres mil pesos; y colegio, duatro mil pesos cada uno.
Asegun con Salvador objeto de ila dale ayuda financial del Sabado con quinientos estudiantes, pero falta o hinde amo el maga requerimientos que ya somete el siento cuarenta’y sinco otro maga estudiantes.
Asegun con Salvador ya informa ya sila con aquellos quien falta el maga requerimientos para completa de ila maga documentos.
Acordando cay de mas temprano del Sabado, veinte nueve personas el ya iri y sinti duele cay ya tene estampida por causa todo quiere man una entra na coliseo del ciudad para adqueri ayuda financial desde’l DSWD.
Con el ayuda del maga oficiales del sector de seguridad y govierno local, ya puede aregla un systema para enbuenamente distribuji con el ayuda financial con maga beneficiaryo. (Bong Garcia, Jr., photo courtesy of Department of Social Welfare and Development IX)