Tres myembros del Dawlah Islamiya ya rindi con el tropa del fuersa militar na province del Sur Cotabato y na Lanao del Norte.
Con el tres myembros de Dawlah Islamiya quien ya rindi ya nombra lang por medio del de ila maga alias como canda Lapong, Habdani, y Mao.
Asegun con Mayor Heneral (Major General) Roy Galido, comandante del Joint Task Force Central, cay si Lapong ya rindi del Biyernes na quartel del 10th Special Forces Company na Barangay Kablon, Tupi, Sur Cotabato.
Si Lapong ya entrega un calibre cuarenta’y sinco pistola y maga bala.
Si Lapong bajo ahora el custodiya del 5th Special Forces Battalion.
Asegun con Heneral de Brigada (Brigadier General) Antonio Nafarrete, comandante del Joint Task Force ZamPeLan, cay canda Habdani y Mao ya rindi con el tropa del 49th Infantry Battalion an Munai, Lanao del Norte.
Asegun con Nafarrete cay el dos ya entrega in rifle Garand y un Sniper rifle.
Con Habdani y Mao ya pone bajo el custodiya del 49th Infantry Battalion. (Bong Garcia, Jr., photo courtesy of Western Mindanao Command)