Tres personas, incluwido un menor de edad, el ya sustene irida na de ila cuerpo cuando ya gulpia canila ocho personas ayer aga alli na Barangay Zone 3, este ciudad del Zamboanga.
El pulisiya local ya nombra con el mga victima como canda Michael Asnung, cuarenta’ uno anios y si Louie Serna, deci-nueve anios. El terser victima un menor de edad.
Cuatro del ocho suspechao ya conose como canda Jurenie Sumacay, trenta’y seis anios; Cargion Dumpol, veinte siete; Joel Cansingan, veinte; y si Jerico Sanggiran, deci-nueve anios el edad.
El otro cuatro suspechao, quien ta esta desconosidos, ya escapa cuando ya llega el maga pulis.
Asegun na investigacion del pulis cay antes el incidente, uno del maga victima ya llama el atencion del uno del maga suspechao por causa bien alboroto el mafler del de suyu motor.
Asegun con el pulis ya sale el maga suspechao y despues ya bira otravez llebando cuchillo, garrote, bolo, tejeras y botella y despues ya gulpia con el maga victima.
El maga pulis ya confisca na posesyon del maga suspechao del ila maga armas y dos motorsiclo.
Con el maga arestao suspechao ya detene na Police Station 11. (Regino Delos Santos)