Maga autoridad ya aresta con el aka-sinco persona buscada (wanted person) na municipio de Midsalip alla na provincia del Zamboanga del Sur.
El Coronel John Francis Encinareal, el hefe del Criminal Investigation and Detection Group (CIDG) na rehyon nueve, ya nombra con el arestao persona como si Mario Ramos que tiene el edad de treynta anios.
Asegun con Encinareal cay con Ramos ya aresta maga alas sinco Biyernes aga na Purok 3, Barangay Tulbong, Midsalip, Zamboanga del Sur.
Asegun con Encinareal cay si Ramos tiene pendiente orden de aresto por el asunto de cuatro tiempos (four counts) de matansa sin piansa desde’l el tribunal del municipio de Aurora, Zamboanga del Sur.
Si Encinareal ya habla cay si Ramos envuelto na matansa del cuatro mymebros del familya Udarbe-Aliego del april deci-ocho este anio alla na Purok 3, Barangay Tulbong, Midsalip, Zamboanga del Sur.
Si Ramos bajo ahora del custodiya del CIDG na Zamboanga del Sur. (Bong Garcia, Jr., photo courtesy of Criminal Investigation and Detection Group IX)