Sinco myembros del New People’s Army, quien ta deseya vivi pacifico vida hunto con el de ila familya, el ya rindi con maga autoridad alla na provincia del Sur Cotabato.
Aquellos quien ya rindi amo el maga siguentes: Jason Dela Cruz, veinte ocho años; Analie Baoya, veinte sinco; Francisco Pamat, Hijo, treynta’y cuatro; Vicente Heraldez, Hijo, veinte sinco; y si Rosewin Angab, treynta años el edad.
Asegun con Coronel Richard Verceles, operations chief del Area Police Command-Western Mindanao, cay el sinco rebelde NPA ya rindi con maga autoridad del Martes tarde na Barangay Kinilis, Polomolok, Sur Cotabato.
Asegun con Verceles cay ya entraga el sinco antes myembros del NPA maga armas de fuego y maga improvised bomba cuando ya rindi sila.
Si Verceles ya habla cay el rindida del sinco myembros del NPA es un resulta na esfuerso del maga personajes del pulisiya na municipio de polomolok y provincia del Sur Cotabato.
Si Verceles ya habla cay ay pone canila bajo el programa del govierno nombrao como el Enhanced Comprehensive Local Integration Program (E-CLIP). (Bong Garcia, Jr.)