El pulisiya local ya designa ocho sientos sesenta’y cuatro personajes para guardia con diferente escuelas publico prinicpiano del Lunes, el primer dia del clase y por primera ves ya abre maga escuela despues de dos anios por causa del pandemia.
Asegun con Coronel Alexander Lorenzo, el director del Zamboanga City Police Office, cay quinientos tres del ocho sientos sesenta’y cuatro personajes del seguridad compuesto del maga myembros del pulisiya local y el restante tresientos sesenta’y uno amo maga “force multipliers.”
Base na lista del Departamento de Education cay tiene el suma total de dosientos deci-nueve mil siento sesenta’y cuatro estudiantes de elementarya, secondarya y escuela secondarya superior el ya entra escuela por primera despues de dos anios por causa del efecto del pandemia que ya principia del Marso anio dos mil veinte.
El ciudad de Zamboanga tiene el suma total de treynta’y tres districto de educacion y serca tresientos escuela.
Si Lorenzo ya diriji con maga personajes de seguridad para asisti tamen na mantencion de trafico na vicinidad del maga escuela puera con el mantenida de seguridad. (Bong Garcia, Jr.)