Maga personajes del pulisiya y Buro de Aduana ya aresta con dos personas y confisca un milyon sincuenta mil de pesos valor de smuggled cigarillo Martes madrogada na mangle del Barangay Talon-Talon, este ciudad.
Si Coronel Richard Verceles, operations chief del Area Police Command-Western Mindanao, ya nombra con el dos aresta personas como canda Victor Hasan, cuarenta’y sinco anios y Lisang Junaidi, deci-ocho anios el edad ambos maga residentes de Sitio Asinan, Barangay Kasanyangan, este ciudad.
Si Verceles ya habla cay el pulisiya y personajes del Buro de Aduana ya conduci un campanya contra smuggling base na un intelligence report que ya resulta na aresto del dos personas y confiscasion del un baroto lleno de cigarillo sin documento.
Asegun con Verceles cay el baroto ya carga treynta cahon de smuggled cigarillo que tiene el candidad de un milyon sincuenta mil pesos
Si Verceles ya habla cay el dos arestao personas, el baroto y contrabando bajo ahora na custodiya del Buro de Aduana para el propio disposision. (Bong Garcia, Jr.) (Photo Courtesy Area Police Command- Western Mindanao)