Maga operativas del Philippine Drug Enforcement Agency (PDEA) ya aresta con un pesona y confisca tresientos cuarenta mil pesos valor de shabu na un campanya contra droga ilegal na Barangay San Jose Gusu, este ciudad.
Si Emerson Margate, el director rehyonal del PDEA, ya nombra con el arestao suspechao como si Jeremiah Galvez Tarro, un residente de Barangay Mampang, este ciudad.
Asegun con Margate cay maga operativas ya puede recubri na posesion de Tarro no menos de sincuenta gramos de shabu que tiene el valor de tresientos cuarenta mil pesos, un cellphone, un balutan de paltik dinero que ya pone insima un autenticao mil pesos sen.
Si Margate ya habla cay detenido ahora si Tarro y ta prepara ya maga documentos para el plantada del formal asunto contra con el suspechao. (Bong Garcia, Jr., photo courtesy of Philippine Drug Enforcement Agency IX)