Zamboanga: Oficina de salud local ya abre otravez con el ‘mega isolation facility’

0
0

El oficina de salud del ciudad ya abre otravez con el “mega isolation facility” na Barangay Talisayan para sirvi de omento con el facilidad na Pasonanca por causa ta continua subi el activo caso de coronavirus disease 2019 (Covid-19) aqui na ciudad de Zamboanga.

Visit RPN DXXX Zamboanga

Asegun con Doctora Dulce Amor Miravite, el hefe del oficina de salud, cay na critical situacion ya el facilidad na Barangay Pasonanca por causa tiene el suma total de setenta paciente el admitido na mencionao facilidad.

Asegun con Miravite cay tiene ya tamen catorse paciente el admitido este tiempo na mega isolation facility na Barangay Talisayan.

Base na lista que ya ase sale el oficina de salud este dia de Biyernes cay el ciudad tiene el suma total de tresientos setenta’y seis activo caso de Covid-19; veinte ocho mil seis sientos sincuenta paciente el ya queda bueno; treynta mil dosientos noventa’y nueve confirmao caso de Covid-19; y mil dosientos setenta’y uno paciente ya muri por causa de Covid-19 virus.

Si Miravite ya habla cay ay abre tamen sila con el facilidad na Barangay Cabatangan para recivi paciente de Covid-19.

Myentrastanto, si Miravite ta apela con el publico para continua practica con el “minimum health protocols” y otro manera de proteccion contra el Covid-19 virus. (Bong Garcia, Jr., (photo courtesy of City Hall Public Information Office)

LEAVE A REPLY

Please enter your comment!
Please enter your name here