Ya rindi el mano derecha del detenido lider de un grupo de criminal na provincia de Tawi-Tawi que ya resulta na bungkada del grupo.
Si Coronel Richard Verceles, el operations chief del Area Police Command-Western Mindanao, ya habla cay si Samsuddin Kuttuh ya rindi mga alas dies y media del aga del lunes na Barangay Poblacion, Bongao, Tawi-Tawi.
Si Verceles ya habla cay si Kuttuh ya decidi rindi y entrega un calibre cuarenta’y sinco pistola siguiendo el sin descanso “intelligence-driven operation” contra con el suspechao na provincia de Tawi-Tawi.
Asegun con Verceles cay si Kuttuh amo el mano derecha de Karaiti Lukuh, el lider del “Lukuh crime group” que ta opera na municipio de South Ubian y sercanos lugar na provincia de Tawi-Tawi.
Si Lukuh presentamente detenido na calaboso del provincia de Tawi-Tawi por causa na asunto de ilegal posesion de armas de fuego.
Asegun con Verceles cay si Kuttuh amo el solamente myembro de del grupo de Luku ta esta libre cay el otro dos de compiansa del detenido lider ya muri na maga encuentro de antes contra con maga otoridad.
Asegun con Verceles cay el “Lukuh crime group” un armao grupo del alta calibre de armas de fuego y ya sirvi como maga maton (goons) del antes alto funccionarios na municipio del South Ubian durante el anios de dos mil trese y dos mil deci-ocho. (Bong Garcia, Jr.) (Photo Courtesy of Tawi- Tawi Provincial Mobile Force Company)