Un myembro del Bangsamoro Islamic Freedom Fighters (BIFF) ya rindi na autoridad alla na provincia de Maguindanao.
Si Tiniente Coronel Ferdinand Dela Cruz, comandante del 6th Mechanized Infantry Battalion, ya nombra lang con el BIFF que ya rindi como un tal Rosbil, quien na mismo tiempo myembro de un privado armao group bajo el liderato de Jun Barang.
Si Rosbil ya entrega su armas de fuego de alta calibre con Dela Cruz cuando ya rindi ele del Miyerkoles na Sultan Kudarat, Maguindanao.
Con Rosbil ya presenta si Dela Cruz con Tiniente Coronel Johnny Bayog, el Chief of Staff del 1st Brigade Combat Team na Barangay Pigcalagan, Sultan Kudarat, Maguindanao.
Si Rosbil ya recivi ayuda bajo el programa de “Balik-Baril” del govierno de municipalidad del Sultan Kudarat. (Bong Garcia, Jr., photo courtesy of 6th Mechanized Infantry Batallion)