Un myembro del Bangsamoro Islamic Freedom Fighters (BIFF) el ya muri myentras maga componente para ase bomba el ya recubri maga autoridad despues que ya man tirahan maga BIFF y soldao del Domingo madrogada na Barangay Dumablac na municipio de Talayan na provincial de Maguindanao.
Asegun con Coronel Richard Verceles, el operations chief del Area Police Command-Western Mindanao, cay el encuentro ya ocuri maga alas dos y media del Domingo madrogada myentras el maga mymebros del BIFF ya ajunta puersa na Barangay Dumablac na municipio de Talayan.
Si Verceles ya nombra con el myembro del BIFF quien ya muri na encuentro como si Karutin Kamid Kalantungan, un sigidores del faccion del Bungos del BIFF.
El tirahan ya ocuri cuando maga soldao del 6th Infantry Division ya puede columbra con maga myembros del BIFF myentras ta man patrulya sila na Barangay Dumablac.
Asegun con Verceles cay con el resto de Kalantungan y maga componente para ase bomba ya encontra maga soldao despues el tirahan.
Con el resto de Kalantungan ya entrega con el barrio capitan del Dumablac para el propio disposision y intiero. (Bong Garcia, Jr.)