El govierno local ya confisca catorse triciclo (tricycle) por causa tiene defecto na de ila maga documentos.
Asegun con Police Major Chester Natividad, el hefe del City Traffic Enforcement Unit (CTEU), el catorse confiscao triciclo parte del total de noventa’y siente triciclos ya cuji sila durante el campanya contra maga colorum triciclo ta viaja aqui na ciudad.
Asegun con Natividad cay el objeto del campanya amo para elimina maga colorum triciclo y ilegal franquisa ta opera aqui na ciudad de Zamboanga.
Asegun con Natividad cay ay devolve lang sila con el catorse confiscao triciclo si tiene ya propio documentos el maga duenio del vehiculo.
Si Natividad ya habla cay debe maga duenio del triciclo tiene completo maga requerimientos que ta incluwi el franquisa y registrao.
El campanya contra colorum triciclo amo para proteje con el maga pasajeo y aquellos tiene completo documentos.
Si Natividad ya apela con el public para esta vigilante y no munta na maga colorum triciclo y tambien reporta na su oficina aserca maga error ta comete maga chufer. (Bong Garcia, Jr., photo courtesy of City Government of Zamboanga Facebook page)