Zamboanga: Dos negociantes de droga ilegal na Basilan muerto na tirahan

0
0

Dos negogiantes de droga ilegal ya muri na tirahan contra maga pulis and soldao na provincia de Basilan.

Si Coronel Pedro Martirez, Hijo, el Basilan police director, ya nombra con el maga negociantes de droga ilegal quien ya muri na tirahan como canda Macsud Cuevas, un residente de Barangay Bohelebong, Tipo Tipo, y Dasman Kilala, residente de isla de Bubuan, Tabuan Lasa.

Si Martirez ya habla cay el tirahan na ocuri maga alas dose y media del tarde del Martes alla na Barangay Semut na municipio de Akbar.

Asegun con Martirez ya ocuri el tirahan cuando si Cuevas ya aranca su caurenta’y sinco pistola y ya tira cuando ya sinti le cay ta ase sila transaccion de droga ilegal con maga secreta del pulisiya myentras si Kilala ya man mani-obra con el de ila vinta de makina para escapa.

Pero asegun con Martirez ya tupa bala con Cuevas cuando ya ase balus maga pulis y soldao myentras ta ase apas con el dos suspechao que ta precuara escapa.

Ya tupa tamen bala con Kilala cuando ya pipina le con el armas de fuego de Cuevas y tira con el maga otoridad. Ambos si Cuevas y Kilala enseguidas ya muri durante el tirahan.

Asegun con Martirez el maga tropa ya recubri na posesion del dos muerto suspechao veinte gramos de shabu con el valor de siento cuarenta mil pesos, un calibre cuarenta’y sinco pistola con maga bala, un cellphone, ochenta’y nueve pedaso de mil pesos replica como “boodle money” que ya pone insima un verdadero quinientos pesos markao sen, y un vinta con makina. (Bong Garcia, Jr.) (Photo Courtesy of Basilan Police Provincial Office)

LEAVE A REPLY

Please enter your comment!
Please enter your name here