Maga personajes del pulisiya, militar y Philippine Drug Enforcement Agency (PDEA) ya aresta con dos personas martes aga y ya confisca suspechao shabu que tiene el valor de seis punto ocho milyones de pesos na vicinidad del pantalan na Bongao, Tawi-Tawi.
Si Coronel Richard Verceles, operations chief del Area Police Command-Western Mindanao, ya nombra con el dos arestao suspechao como canda Nurhamin Nurhussin y si Hosna Nurhussin Rahim.
Asegun con Verceles cay con el maga suspechao ya aresta na un “but-bust operation” maga alas sinco Martes aga serka na pantalan na Barangay Poblacion, Bongao, Tawi-Tawi.
Asegun con Verceles ya puede confisca na posesion del maga suspechao uno kilo de suspchao shabu que tiene el cantidad de seis punto 0cho milyones de pesos, onse balutan de “boodle money” y mil peso markao sen.
Con el dos suspechao, droga ilegal y otro maga cosas ya entrega na custodiya de PDEA del rehyon autonomo. (Bong Garcia, Jr., photo courtesy of Police Regional Office- Bangsamoro Autonomous Region)