Veinte tres maga maestro y maestro ya atende con el dos dias entreno para el produccion de gulay bajo el programa del Gulayan sa Paaralan del Departamento de Agricultural.
El entreno para el primer grupo de maestro y maestra ya conduci del martes hastra miyercoles na un hotel alli na Barangay Tumaga, este ciudad.
Aquellos quine ya atende con el entreno amo maga coordinador del programa de Gulayan sa Paaralan na de ila cada’y cual escuela y mayoriya de ila desde el Segundo distrito del ciudad.
Si Arnulfo Estrada, el Agricultural Program Coordinator para el ciudad de Zamboanga y Isabela, ya apresia con el maga maestro y maestro cay ya dale sila importansia con el entreno por el de ila presensia y interes ometa saber na produccion de gulay.
Optimisco si Estrada cay ay usa el maga maestro y maestra el saber que ya puede sila aprende durante el dos dias entreno el momento bira sila na de ila cada’y cual escuela.
Asegun con Estrada cay el produccion de gulay es un parte lang del solusyon na asuntos de seguridad de comida na pais.
Ya dale coraje si Estrada con el maga participantes del entreno para simebra gulay usando el natural manera cay Bueno este na salud del un persona y ay ayuda pa preserva con el media-ambiente.
Asegun con Estrada cay el maga maestro y maestra amo el partner de ila para empoja el produccion de ulay na de ila cada’y cual escuela y comunidad.
Despues del dos dias entreno, el Departamento de Agricultura ya dale maga arimienta de jardin con el maga participantes del actividad para puede sila usa na escuela. (Bong Garcia, photo courtesy of Department of Agriculture Region 9 Facebook page)